Bedazzled 7 nasa Club Mwah!
Sanga-Sangandila: Veronica Samio

Balak sana ng magka-partner na Cris Nicolas (artistic director) at Pocholo Malilin (administrative officer) ng Club Mwah na tapusin na ang Bedazzled 6 nang huling buwan ng 2006 at simulan ang Bedazzled 7 sa pagsisimula ng 2007. Pero, hindi nila ito nagawa dahil kinapos sila ng panahon para matapos lahat ang mga set na gagamitin sa bagong produksyon na mga Broadway Hits pa rin pero, kung hindi binigyan ng comic relief ay ginawa namang mas maganda pa sa orihinal na bersyon sa Broadway.

Matapos na ang Valentine's Day nang masimulan ang Bedazzled 7 na mapapanood tuwing Huwebes, Biyernes at Sabado, 10:30 ng gabi sa Club Mwah na matatagpuan sa ikatlong palapag ng The Venue Tower sa Boni Ave. sa Mandaluyong City.

Sa mga hindi pa nakapanood ng Bedazzled 6 o kaya ay gusto pang ulitin ang panonood dito dahil talaga namang bukod sa makulay ang sets at costumes ay talaga namang napakaganda ng konsepto ng mga excerpts ng Broadway, Moulin Rouge o Studio 54 na mga pagtatanghal, ay palabas pa rin ito tuwing Miyerkules sa nasabing lugar at sa kapareho ring oras.

Bukod sa magagandang palabas, tumatanggap din ang Club Mwah ng mga events tulad ng product launchings, concerts, birthdays and anniversaries, at ilang mga remote telecast ng mga anniversary presentation ng ilang mga TV programs. Tumawag lamang sa telepono 5312953/5322826.

•  back to reviews index